Konfransın əsas məqsədi qlobal iqlim dəyişmələrinin su resurslarına təsirinin kompleks şəkildə elmi cəhətdən qiymətləndirilməsi, su ehtiyatlarının qorunması və dayanıqlı idarə olunması sahəsində müasir elmi yanaşmaların müzakirəsi, nəzəri və tətbiqi tədqiqatların nəticələrinin paylaşılması, innovativ həllərin təşviqi, eləcə də yerli və xarici alimlər arasında elmi əməkdaşlığın inkişaf etdirilməsidir.

Konfrans çərçivəsində aşağıdakı vəzifələrin həyata keçirilməsi nəzərdə tutulur:

• qlobal iqlim dəyişmələrinin su ehtiyatlarına təsirinin elmi aspektlərinin araşdırılması;
• su təhlükəsizliyi və su resurslarının dayanıqlı idarə olunması üzrə yeni elmi yanaşmaların müzakirəsi;
• su qıtlığı, quraqlıq və ekstremal hidroloji hadisələrin yaratdığı risklərin qiymətləndirilməsi;
• su ehtiyatlarının monitorinqi, idarə olunması və proqnozlaşdırılmasında müasir rəqəmsal texnologiyaların tətbiq imkanlarının araşdırılması;
• su ekosistemlərinin qorunması və ekoloji davamlılığın təmin olunmasına dair elmi təkliflərin hazırlanması;
• dövlət qurumları, ali təhsil müəssisələri, elmi-tədqiqat institutları və beynəlxalq təşkilatlar arasında əməkdaşlığın genişləndirilməsi;
• gənc tədqiqatçıların elmi fəaliyyətə cəlb olunmasının və beynəlxalq elmi inteqrasiyanın təşviqi.

Su resursları həyatın davamlılığını, ekoloji tarazlığı və sosial-iqtisadi inkişafı təmin edən strateji təbii sərvətlərdən biridir. Qlobal iqlim dəyişmələrinin sürətlənməsi su ehtiyatlarının qorunması və rasional istifadəsini bütün dövlətlər üçün milli təhlükəsizlik və dayanıqlı inkişaf məsələsinə çevirmişdir.

Azərbaycan Respublikasında da su ehtiyatlarının səmərəli idarə olunması dövlət siyasətinin prioritet istiqamətlərindən biridir. Bu istiqamətdə həyata keçirilən institusional islahatlar, su infrastrukturunun modernləşdirilməsi, su ehtiyatlarının inteqrasiyalı idarə olunması və iqlim dəyişmələrinə uyğunlaşma tədbirləri ölkənin uzunmüddətli inkişaf strategiyasının mühüm tərkib hissəsini təşkil edir.

Konfransın keçirilməsi qlobal iqlim dəyişmələrinin su ehtiyatlarına təsirinin daha dərindən öyrənilməsinə, su təhlükəsizliyi və dayanıqlı su idarəçiliyi üzrə elmi-nəzəri bazanın zənginləşdirilməsinə, beynəlxalq təcrübənin öyrənilməsinə və gələcək elmi-tədqiqat layihələrinin formalaşdırılmasına mühüm töhfə verəcəkdir.