Konfransın məqsədi

Təməli ulu öndər Heydər Əliyev tərəfindən qoyulmuş milli səhiyyə sistemi, səhiyyədə ənənəviliklə müasirliyin üzvi vəhdətinin təmin olunması, eləcə də Azərbaycan səhiyyəsinin dünya standartlarına uyğunlaşdırılması prinsiplərinə əsaslanır. Hazırda səhiyyənin və xüsusilə də ali tibb təhsilinin inkişafına xüsusi əhəmiyyət verilməsi, yüksək qayğı və diqqət göstərilməsi, yüksəkixtisaslı kadrların hazırlanmasına mühüm yer verilməsi sayəsində böyük uğurlar qazanılmaqdadır.

Naxçıvan Dövlət Universitetində də ardıcıl və hərtərəfli dövlət qayğısı sayəsində təhsil və elmi-tədqiqat işlərinin səviyyəsinin daha da yüksəldilməsi, beynəlxalq əlaqələrin genişləndirilməsi, maddi-texniki bazanın əsaslı şəkildə möhkəmləndirilməsi və yenidən qurulması istiqamətində çoxşaxəli tədbirlər həyata keçirilmiş, xüsusilə tibb sahəsi üzrə kadr hazırlığı həmişə diqqətdə saxlanılmışdır.

Ümummilli Liderimiz Heydər Əliyevin himayəsi ilə 1999-cu ildə fəaliyyətə başlayan Tibb fakültəsi böyük inkişaf yolu keçib, muxtar respublikada ixtisaslı həkim hazırlığının əsası qoyulub. Ötən 25 ildə fakültədə tələbələrin təhsili üçün lazımi şərait yaradılıb, tədris binası, xəstəxana, simulyasiya mərkəzləri, kabinə və laboratoriyalar istifadəyə verilib.

Aparılan məqsədyönlü səhiyyə siyasətinin davamı olaraq 2022-ci ildə Naxçıvanda, 2024-cü ildə İstanbulda keçirilmiş, 2025-ci ildə Özbəkistan Respublikasının Səmərqənd şəhərində keçirilməsi planlaşdırılan Beynəlxalq Tibbi Forum, hər il keçirilən müxtəlif konqres, simpozium.ş konfranslar praktik tibb fəaliyyəti ilə məşğul olan həkimlərlə yanaşı, yetişən gənc həkimləırin, tələbələrin bilik, bacarıq və peşəkar vərdişlərinin inkişaf etdirilməsinə yönəldilmiş proses kimi mühüm əhəmiyyət daşımaqdadır.

Naxçıvan Dövlət Universiteti, Azərbaycan Tibb Universiteti, İ.M.Seçenov adına I Moskva Dövlət Tibb Universitetinin Bakı filialı, Azərbaycan Həkimləri Təkmilləşdirmə İnstitutu ilə yanaşı, Türkiyə, Qazaxıstan, Özbəkistan, Qırğızıstan kimi bir sıra xarici ölkələrin tibb sahəsi üzrə kadr hazırlayanelm-təhsil müəssisələri, tibbi dərnəkləri ilə geniş əməkdaşlıqlar qurulmuş, ildə bir neçə dəfə bu qurumlarla ortaq layihələr həyata keçirilir və yüksək ixtisaslı həkim mütəxəssisləri universitetə dəvət olunur.

         Qeyd olunanlar universitetdə yüksək ixtisaslı tibbi kadr hazırlığına töhfə verməklə yanaşı, elmi yeniliklərin davamlı inteqrasiyası baxımından Naxçıvan və Azərbaycan səhiyyəsinin inkişafında mühüm rol oynamaqdadır.

Bu məqsədlə 29-30 may 2025-ci ildə keçirilməsi planlaşdırlan və Naxçıvan Dövlət Universitetinin Tibb fakültəsinin 25 illik yubileyinə həsr olunmuş “Cərrahi və Mama-Ginekoloji Problemlərə Multidissiplinar Yanaşmalar” adlı Beynəlxalq Elmi-praktik konfrans dünyada cərrahiyyə və ginekologiyanın aktual məsələlərinin müzakirəsi ilə yanaşı Naxçıvan MR-də də səhiyyənin bu istiqamət üzrə problemlərinin həlli yollarının axtarılması, düzgün istiqamətlərin verilməsi, yeni texnologiyaların və müsir metodların tətbiqi baxımından öz töhfəsini verəcəkdir. Konfrans ərəfəsində Naxçıvan MR-də ödənişsiz olaraq qadın sağlığı üzrə praktik müayinə və müalicə proseslərinin, cərrahi əməliyyatların keçirilməsi planlaşdırılmışdır.