Konfransın məqsədi

Dünya Səhiyyə Təşkilatının məlumatına görə, yer kürəsində yaşayan əhalinin təqribən 10%-ə qədəri allergik xəstəliklərdən əziyyət çəkir ki, bunun da 1,5-2%-i bronxial astmanın payına düşür. Məlumata görə, hazırda dünyada 15 milyon nəfərə yaxın insan bronxial astmalı xəstədir. Bu kimi bir çox xəstəliklərin, müalicəsində duz şaxtası şəraitində aparılan müalicə, yəni spleoterapiya həmişə öz müsbət təsirini göstərmişdir.

Duzdağ - Naxçıvanın rəmzlərindən biri olub, təbii ehtiyatları 90 milyon ton təşkil edir. Naxçıvan özünün nadir duz mağarası ilə məşhurdur. Astma xəstəliyinin müalicəsi üçün illərdən bəri primitiv üsullarla istifadə edilən mağara hazırda günün tələblərinə tam cavab verən müasir sağlamlıq mərkəzinə çevrilmişdir. Dağın altına doğru 300 metr uzanan və divarları duz qayaları ilə örtülü “Duzdağ” Fizioterapiya Mərkəzinin dünyada bənzəri yoxdur. Buraya gələnlər təxminən bir həftə gecələri duz mağarasında keçirdikdən sonra yenidən sağlamlıqlarına qovuşurlar

Duzdağda aparılan araşdırmalar sübut edir ki, Eneolit dövründən başlayaraq Naxçıvanda mədənçilik mövcud olmuş, eradan əvvəl 4-cü minillikdə bu proses daha geniş miqyas almış, mübadilə məqsədi ilə tələbatdan artıq duz tədarük olunmuş, bu isə öz növbəsində şəhərlərarası əlaqələrə və ticarətin inkişafına, eləcə də insanların Duzdağ ətrafında məskunlaşmasına gətirib çıxarmışdır. XIX əsrin 70-ci illərində Duzdağda aşkar olunan əmək alətləri, daş baltalar və çəkiclər, çapacaqlar, sonrakı dövrdə tapılan ocaq qalıqları, Eneolit, Erkən Tunc və Dəmir dövrünə aid keramika məmulatları, qədim yaşayış yerləri və Duzdağla bağlı folklor nümunələri Duzdağ mədəniyyətinin sistemli şəkildə və yenidən araşdırılması üçün ciddi əsaslar yaradır.

Duz dağı və düz mədəni tarixi araşdırmalara, iqtisadi inkişafa, səhiyyəyə öz töhfəsini verməklə yanaşı davamlı elmi araşdırmalar tələb edən mühüm bir sahədir. Qaya duzunun kimyasının, bioloji təsir xüsusiyyətlərinin, ərazinin tarixinin, coğrafiyasının, flora və faunasının öyrənilməsi baxımından mühüm əhəmiyyətini nəzərə alaraq Duzdağ araşdırmalarının davam etdirilməsi mühüm əhəmiyyət daşımaqdadır.

Konqresin əsas məqsədi Qardaş ölkənin universitetlərinin əməkdaşları ilə Duzdağ mövzusuna dair aparılmış araşdırmaları paylaşmaq, birgə elmi tədqiqatlar apaılması üçün zəmin yaratmaqdan ibarətdir.